Lu sport chi cchiù assa mi piaci a mia
è propiamenti chiddu di piscari,
speci siddu mi pìgghia a lagnusia
afferru canna e lenza e vaiu a lu mari.

Mi mettu a cuncumeddu supra a un scògghiu,
squàgghiu 'nta l'acqua un pocu di muddica,
un pocu 'i sardi, picurinu e ogghiu
e aspettu u fruttu di la me fatica.

Però li pisci ormai su' smaliziati,
quannu vìdinu a mari st'abbunnanza
capìscinu ca forsi su aspittati
di cu' li voli mèttiri 'nta panza.

Ammàtula ci mettu u filu finu,
sempri in suspettu fannu i schinfignusi.
Già mi scurò e vinni di matinu
ma unu nun l'afferru 'i sti tignusi!

Chi fazzu? M'arricampu senza nenti,
senza mancu un mulettu nto' panaru?
E chi figura fazzu cu i parenti!?
No! Passu nn'o' Baruni, lu pisciaru,

ni pìgghiu quattru o cincu, ma scartati,
di chiddi propiu beddi, di valuri...
e i picciriddi su' tutti priati
d'aviri un patri veru piscaturi!

TRADUZIONE
IL PESCATORE SPORTIVO
Lo sport che più piace a me
è esattamente quello della pesca,
specialmente se mi prende la noia,
prendo la canna e la lenza e vado al mare.
Mi metto accoccolato su uno scoglio,
sciolgo nell'acqua un po' di mollica,
un po' di sarde, pecorino ed olio
e aspetto il frutto della mia fatica.
Però i pesci sono ormai smaliziati:
quando vedono a mare quest'abbondanza
capiscono che forse sono attesi
da chi vuole metterseli in pancia.
Inutilmente utilizzo un filo sottile,
sempre in sospetto, fanno gli schizzinosi.
Già s'è fatto buio e son venuto al mattino,
ma non ne acchiappo uno di questi "testapelata"!
Cosa faccio? Rientro senza niente,
senza neanche un cefalo nel paniere?
E che figura faccio con i parenti!?
No! Passo dal "Barone", il pescivendolo,
ne piglio quattro o cinque, ma scelti
di quelli proprio belli, di valore...
e i bimbi saranno così contenti
d'avere un papà pescatore in gamba.