Ogn'annu c'è 'n Palermu lu Fistinu,
fattu a tistimunianza di l'amuri
ca, ancòra 'nta cità, ogni citatinu
porta a la Santa pi lu gran favuri.
Ci su li "botti", c'è la prucissioni,
prigheri cu firvuri e divuzioni!

Passa la "Vara" cu l'urna d'argentu
pi u Càssaru e li strati illuminati...
la pesti fu guarita, ma un turmentu
ancòra ccà camina strati strati:
chidda pesti finìu, ma n'àutru mali
c'è cchiù pisanti. E un sèrvinu spitali!

La pesti canciò nomi... è cchiù viulenta,
nun s'accuntenta cchiù d'a vita umana,
ora l'anima scippa! Ni turmenta,
cu milli tintazioni n'arruffiana!
Canciò lu nomi pi nun si scupriri,
ma u stissu a tanta genti fà muriri.

Vinni vilenu a i pòviri 'nnuccenti,
minaccia, spara e ammazza pi la via
e misi tanti ràdichi pussenti
ca sulu veru un santu ci purrìa.
Su' sempri chini 'i sangu li balati
e senza morti 'un pàssanu jurnati!

Su' ràdichi chiantati 'nta 'gnuranza,
'nta la miseria e a disoccupazioni,
'nta l'egoismu i l'omini e a mancanza
di cu' guverna senza azioni boni!
Iu, quannu è lu fistinu, una prighera
la dicu 'nta na 'gnuni, ma sincera.

Ci dicu: "Santa, ma picchì nun senti,
picchì n'abbannunasti 'nta li manu
d'omini senza amuri?! Ccà la genti
nun sapi cchiù zocch'è campari umanu!
Fà ca ogni cori arreri dici a tia:
- Viva Palermu e Santa Rusulia! -

TRADUZIONE
IL FESTINO OGGI
Ogni anno a Palermo c'è il "Festino",
fatto a testimonianza dell'amore
che, ancor nella citta, ogni cittadino
porta alla Santa per il "gran favore".
Ci sono i "botti" c'è la processione,
preghiere con fervore e devozione!
Passa la "Vara" con l'urna d'argento
pel "Càssaro" e le strade illuminate...
la peste fu guarita, ma un tormento
ancora qui cammina per le strade:
quella peste finì, ma un altro male
c'è più pesante. Non serve l'ospedale!
La peste cambiò nome... è più violenta
non si accontenta della vita umana,
ora l'anima ruba! Ci tormenta
con mille tentazioni si arruffiana!
Cambiato ha il nome per non si scoprire,
lo stesso a tanta gente fà soffrire.
Vende veleno ai poveri innocenti,
minaccia, spara e ammazza per la via
e ha messo le radici sue possenti,
che solamente un santo ci potrebbe.
Son sempre insanguinate le balate
e senza morti non ci son giornate!
Sono radici piantate nell'ignoranza,
nella miseria e la disoccupazione,
nell'egoismo degli uomini e la mancanza
di chi governa senza azioni buone!
Io, quando è il festino, una preghiera
la dico in un angolo, ma sincera.
Le dico: "Santa, ma perchè non senti,
perchè ci hai abbandonato nelle mani
d'uomini senza amore?! Qui la gente
non sa che sia il vivere umano!
Fà che ogni cuore torni a dire a te:
- Viva Palermo e Santa Rosalia! -