C'era, tant'anni arreri,
una principissina,
ca, mòrtuci lu patri,
faciva la mischina.

Vivìa cu la matrigna
'na vita travagghiata
e pi la so' biddizza
era sempri invidiata.

Quannu 'un ni potti cchiù
scappò di lu casteddu
e nmenzu a la foresta,
guidata d'un aceddu,

truvò na casa nica
dunni nun c'era genti:
trasìu e s'arripusò
pi quantu era accugghienti.

Mentri durmìa arrivaru
'nta ca li patruni,
eranu setti nani
e eranu dijuni!

S'arruspigghiò la bedda,
li nani si scantaru:
"Nun fàtivi paura...
la cena vi priparu"!

Manciaru tutti 'nsèmmula
e quannu poi fineru
ci puliziò li piatti,
tuttu lucìa pi veru.

Felici eranu i nani
pi chista cugnintura;
trattavanu la bedda
cu garbu e cu primura.

Ma un prìncipi spuntò
e docu, pi daveru,
l'ova dintra o' panaru
a i nani si rumperu!

Supra a un cavaddu biancu
parteru li du' amanti,
sintennu pi d'appressu
li strepiti e li chianti.

Tutti e setti li nani,
distrutti pi u duluri,
pi sempri avìanu persu
u loru granni amuri!

Ma chistu un era nenti
di cchiù 'i lassò disfatti
lu fattu ca pirderu
cu ci lavava i piatti!

TRADUZIONE
BIANCANEVE & C.
C'era, tanti anni addietro,
una principessina
che, perso il padre,
faceva la poverina;
viveva, con la matrigna,
una vita sofferta
e, per la sua bellezza,
era sempre invidiata.
Quando non ne potè più
scappò dal castello
e in mezzo alla foresta,
guidata da un uccello,
trovò una casa piccola
dove non c'era gente:
entrò e si riposò
per quanto era accogliente!
Mentre dormiva giunsero
nella casa i padroni:
erano sette nani
ed erano digiuni!
Si risvegliò la bella,
i nani si spaventarono:
"Non abbiate paura,
la cena vi preparo"!
Mangiarono tutti insieme
e poi, quando finirono,
pulì loro i piatti,
tutto splendeva veramente!
Felici erano i nani
per questa occasione;
trattavano la bella
con garbo e con premure.
Ma un principe spuntò
a questo, veramente,
le uova dentro al paniere
ai nani si ruppero!
Sopra un cavallo bianco
partirono i due amanti
sentendo dietro di loro
gli strepiti ed i pianti.
Tutti e sette i nani,
distrutti per il dolore,
per sempre avevano perso
il loro grande amore.
Ma questo non era niente,
di più li lascio disfatti
il fatto che perdettero
chi gli lavava i piatti!